[ Contents ] [ Intro ] [ Glossary ]
Chapters
[ I ] [ II ] [ III ] [ IV ] [ V ] [ VI ] [ VII ] [ VIII ] [ IX ] [ X ] [ XI ] [ XII ] [ XIII ]
Texts
[ Tatian ] [ Psalms ] [ St Emeramer Gebet ] [ Otfrid ] [ Das Ludwigslied ] [ Muspilli ] [ Notes ]


VII

Muspilli

The Muspilli, written in the Bavarian dialect, was probably com­posed about the year 850. The author is unknown. It was first edited by Schmeller in 1852:  ‘Muspilli, Bruchstück einer alliterierenden Dichtung vom Ende der Welt.’

 

. . . . . sin tac piqueme    daz er touuan scal.

uuanta sar so sih diu sela    in den sind arhevit,

enti si den lihhamun    likkan lazzit,

so quimit ein heri    fona himilzungalon,

daz andar fona pehhe:    dar pagant siu umpi.

Sorgen mac diu sela,    unzi diu suona arget,

za uuederemo herie    si gihalot uuerde.

uuanta ipu sia daz Satanazses    kisindi kiuuinnit,

daz leitit sia sar     dar iru leid uuirdit,

in fuir enti in finstri:     daz ist rehto virinlih ding.

upi sia avar kihalont die    die dar fona himile quemant,

enti si dero engilo     eigan uuirdit,

die prmgent sia sar uf in himilo rihi:

dar ist lip ano tod    lioht ano finstri,

selida ano sorgun:    dar nist siuh neoman.

denne der man in pardisu    pu kiuuinnit,

hus in himile,    dar quimit imo hilfa kinuok.

pidiu ist durft mihhil    allero manno uuelihemo,

daz in es sin muot kispane,         *

daz er kotes uuillun    kemo tuo

enti hella fuir     harto uuise,

pehhes pina:    dar piutit der Satanaz altist

heizzan lauc.    so mac huckan za diu,

sorgen drato,    der sih suntigen uueiz.

uue demo in vinstri scal    sino virina stuen,

prinnan in pehhe:    daz ist rehto paluuic dink,

daz der man haret ze gote    enti imo hilfa ni quimit.

uuanit sih kinada    diu uuenaga sela:

ni ist in kihuctin    himiHskin gote,

uuanta hiar in uuerolti after ni uuerkota.

So denne der mahtigo khuninc    daz mahal kipannit,

dara scal queman    chunno kilihaz:

denne ni kitar parno nohhein    den pan furisizzan,

ni allero manno uuelih    ze demo mahale sculi.

dar scal er vora demo rihhe    az rahhu stantan,

pi daz er in uuerolti    eo kiuuerkot hapeta.

Daz hortih rahhon    dia uueroltrehtuuison,

daz sculi der antichristo    mit Eliase pagan.

der uuarch ist kiuuafanit,    denne uuirdit untar in uuic arhapan.

khenfun sint so kreftic,    diu kosa ist so mihhil.

Elias stritit    pi den euuigon lip,

uuili den rehtkernon    daz rihhi kistarkan:

pidiu scal imo helfan    der himiles kiuualtit.

der antichristo stet    pi demo altfiante,

stet pi demo Satanase,    der inan varsenkan scal:

pidiu scal er in deru uuicsteti     uunt pivallan

enti in demo sinde    sigalos uuerdan.

doh uuanit des vilo ….. gotmanno

daz Elias in demo uuige    aruuartit uuerde.

so daz Eliases pluot    in erda kitriufit,

so inprinnant die perga,    poum ni kistentit

enihc in erdu,    aha artruknent,

muor varsuuilhit sih,    suilizot lougiu der himil.

mano vallit,     prinnit mittilagart,

sten ni kistentit.    verit denne stuatago in lant,

verit mit diu vuiru    viriho uuison:

dar ni mac denne mak andremo helfan vora demo muspille.

denne daz preita uuasal    allaz varprennit,

enti vuir enti luft    iz allaz arfurpit,

uuar ist denne diu marha,     dar man dar eo mit sinen magon piehc?

diu marha ist farprunnan,    diu sela slet pidungan,

ni uueiz mit uuiu puaze:    sar verit si za uuize.

Pidiu ist demo manne so guot,    denne er ze demo mahale quimit,

daz er rahhono uueliha    rehto arteile.

denne ni darf er sorgen,     denne er ze deru suonu quimit.

ni uueiz der uuenago man,     uuielihan uuartil er habet,

denne er mit den miaton    marrit daz rehta,

daz der tiuval dar pi    kitamit stentit.

der hapet in ruovu    rahhono uueliha,

daz der man er enti sid    upiles kifrumita,

daz er iz allaz kisaget,    denne er ze deru suonu quimit.

ni scolta sid manno nohhein    miatun intfahan.

*                *                *

So daz himilisca horn    kihlutit uuirdit,

enti sih der suanari    ana den sind arhevit

[der dar suannan scal    toten enti lepenten],

denne hevit sih mit imo    herio meista,

daz ist allaz so pald    daz imo nioman kipagan ni mak.

denne verit er ze deru mahalsteti    deru dar kimarchot ist:

dar uuirdit diu suona    dia man dar io sageta.

denne varant engila    uper dio marha,

uuechant deota,    umssant ze dinge.

denne scal manno gilih    fona deru moltu arsten,

lossan sih ar dero leuuo vazzon:    scal imo avar sin lip piqueman,

daz er sin reht allaz    kirahhon muozzi,

enti imo after sinen tatin    arteilit uuerde.

denne der gisizzit,    der dar suonnan scal

enti arteillan scal    toten enti quekkhen :

denne stet dar umpi    engilo menigi,

guotero gomono:    gart ist so mihhil:

dara quimit ze deru rihtungu     so vilo dia dar ar resti arstent,

so dar manno nohhein    uuiht pimidan ni mak.

dar scal denne hant sprehhan,    houpit sagen,

allero lido uuelih    unzi in den luzigun vinger,

uuaz er untar desen mannun    mordes kifrumita.

dar ni ist eo so listic man    der dar iouuiht arliugan megi,

daz er kitarnan megi    tato dehheina,

niz al fora demo khuninge kichundit uuerde,

uzzan er iz mit alamusanu  *  furimegi

enti mit fastun    dio virina kipuazti.

denne der paldet    der gipuazzit hapet,

denne er ze deru suonsteti quimit.*

uuirdit denne furi kitragan    daz frono chruci,

dar der heligo Christ    ana arhangan uuard.

denne augit er dio masun,     dio er in deru menniski anfenc,

dio er durah desse mancunnes minna fardoleta.